Podcast

O curso xa vai acabando e hoxe traémosvos unha serie de podcast que realizou o alumnado de 1º de Bacharelato sobre diversos temas en colaboración coa Biblioteca e o EDLG.

Letras Galegas

O luns 19 de maio celebramos as Letras Galegas no instituto cun estupendo festival presentado por Noelia e Miriam, alumnas de 3º ESO. Un ano máis, contamos coa visita das Pandereteiras da Istoria e houbo máis actuacións musicais como a das alumnas de 4º ESO e, por suposto, Fuscalla. O noso grupo de pandereteiras tamén leu un emotivo discurso na honra das cantareiras.

Ademais, puidemos ver diversos traballos en vídeo do noso alumnado como unha selección das cantigas recollidas no proxecto Colleiteir@s de cantigas ou os video poemas presentados ao concurso convocado polo EDLG xunto coa Biblioteca. Outorgamos varios premios neste concurso e, tamén, un premio no concurso de carteis das Letras Galegas. Podedes ver algúns dos vídeos das cantigas recollidas aquí.

Esperamos repetir o próximo curso. Longa vida ás nosas letras e á nosa lingua!

Celanova

Un ano máis visitamos a vila de Celanova co alumnado de 1º de Bacharelato. É un goce volver á Casa dos poetas e ao mosteiro de San Salvador. Sen dúbida, volveremos!

25 de abril

Para conmemorar o 25 de abril, o día da revolución dos cravos, este ano no IES O Ribeiro o alumnado de 2º e 3º ESO fixo cravos de papel que se repartiron no recreo. Mirade que ben quedaron!

Fuscalla no centro de maiores

O mércores 23 de abril Fucalla actuou no centro de maiores de Ribadavia. Foi un pracer agasallar aos nosos maiores coas cantigas e mesmo se animaron a tocar e cantar!

Ciclo de cinema

O último día de clase antes das vacacións, o venres 11 de abril, organizamos un ciclo de cinema para o alumnado de 4º ESO. Os rapaces e rapazas puideron escoller entre catro películas: A Esmorga, O lapis do carpinteiro, Cuñados e Eroski Paraíso. Ademais, despois do visionado, cada persoa cubriu unha valoración sobre a cinta que viu. Foi unha experiencia marabillosa que repetiremos seguro!

8M

Un ano máis conmemoramos o 8M no IES O Ribeiro. Este ano cun mural das irmás Touza realizado polo alumnado de Artes, traballos sobre mulleres pioneiras e marca páxinas na biblio con "Mulleres que marcan". Aquí podedes ver varias fotos dos traballos realizados, así como da concentración impulsada polo alumnado de Artes Escénicas de 2º BACH. A igualdade no Ribeiro é o primeiro!

Entroido

Nas dúas últimas horas do venres 28, celebramos un concurso de disfraces no salón de actos do noso centro. Tamén repartimos premios ás máscaras realizadas polo alumnado de EPVA. E, por suposto, houbo actuación de Fuscalla!

Visita de Paula Carballeira

Onte, 25 de febreiro, tivemos o pracer inmenso de que nos visitara Paula Carballeira no noso instituto. Asistimos a unha fabulosa sesión de contos e puidemos falar con ela sobre algún dos seus libros. De público estivo o alumnado de 2º ESO, que leu Hai quen escolle os camiños máis longos; o alumnado do club de lectura de 1º ESO, que leu Wombo Combo e o alumnado de Artes Escénicas de 2º BACH. Foi unha experiencia fantástica que esperamos que se repita!!!

Día de Rosalía

Este ano, o 23 de febreiro, celebrámolo enchendo o recibidor e a biblioteca con figuras de Rosalía en papel feitas polo alumnado. Nas fotos podedes ver o proceso e o resultado do noso traballo. Ademais, convocamos, por segundo ano, o concurso de poesía e videopoesía. Animádevos a participar!!!

Candeloria

Xa está aquí a Candeloria! Isto significa que xa pasamos a metade do inverno, os días comezan a medrar e a natureza comeza a prepararse para a primavera. Ademais disto, é o momento en que casan os paxaros. Aproveitamos así o 2 de febreiro para celebrar o amor e fixémolo cunhas cartas, que podedes ver nestas imaxes, elaboradas polo alumnado de 1º ESO. Unha fermosura!

Xa é Nadal!

Este ano polo Nadal, ademais de facer o noso festival, decoramos o centro en galego e divulgamos a figura do Apalpador, como podedes ver nas fotografías. No festival tivemos varias actuacións musicais de varios cursos grazas ás profes de Música e dúas obras de teatro grazas ao alumnado de Artes Escénicas. Tamén repartimos os premios do concurso de debuxos e microrrelatos de Samaín e, finalmente, actuou Fuscalla!

Actuación de Fuscalla

Este sábado 30 de novembro Fuscalla actuou en Ribadavia como grupo convidado ao Malgosto, o magosto que sae mal. A actuación foi na Igrexa da Madalena ás 13.00 h e durante toda a xornada puidemos gozar de música e baile. Podedes ver algunha imaxe da nosa actuación nas fotos. Grazas á organización por convidarnos e por celebrar foliadas e festas coma esta!

Mes da ciencia en galego nas bibliotecas

Como sabedes, novembro é o Mes da ciencia en galego nas bibliotecas, por este motivo o EDLG e o Equipo de Biblioteca organizaron varias actividades. Unha foi unha charla do escritor, investigador e divulgador científico Xurxo Mariño. O alumnado de 4º de ESO e o do Club de Ciencia tivo a sorte de ver a Xurxo e desfrutar dos experimentos que nos trouxo. Tamén asinou varios dos seus libros. A outra actividade foi unha mostra dos experimentos do Club de Ciencia que o alumnado puido mostrar a toda a comunidade educativa durante un recreo na biblioteca. Puidemos aprender moito con eles. Ambas foron actividades moi interesantes!

25 N: escape room na biblioteca

Este ano polo 25 de novembro, Día internacional para a eliminación da violencia contra a muller, o EDLG e o Equipo de Biblioteca organizaron un escape room na biblio para 1º e 2º de ESO. O xogo consistía en salvar a unha rapaza, Xiana, dunha relación de violencia a través das pistas ocultas na biblioteca e superando os retos propostos. Aquí tedes unhas imaxes do escaoe room.