CONCURSO INTERNACIONAL DE PODCAST
Damos os parabéns a un grupo de alumnos e alumnas de 4º ESO A que resultou finalista no Concurso Internacional de Podcasts Xosé Mosquera Pérez “O vello dos contos” co podcast que realizaron na clase de lingua galega e literatura. O podcast de David, Laura, Lorena, Oier e Xoel leva o nome de “Informando sobre Florencio” e trata sobre a figura de Florencio Delgado Gurriarán, escritor homenaxeado nas Letras Galegas deste ano.
O IES Rosalía de Castro, organizador do concurso, invítanos a participar no acto de entrega de premios que se levará a cabo este venres 3 de xuño en Santiago de Compostela. Esperemos que haxa sorte! Mentres tanto, podedes escoitar aquí os podcasts.
O alumnado de 4º ESO A acudiu o venres 3 de xuño ao acto de entrega de premios do Certame Internacional de Podcasts Xosé Mosquera Pérez “O vello dos contos”,que se desenvolveu no IES Rosalía de Castro en Santiago de Compostela. Os alumnos e alumnas de 4º ESO traballaron durante o curso nuns podcasts sobre o homenaxeado no Día das Letras Galegas 2022, Florencio Delgado Gurriarán, que presentamos a este concurso. Para a ledicia de todos, o grupo de David Araújo, Laura Negreira, Lorena Rodríguez, Oier Galán e Xoel González quedou finalista.
Non puidemos gañar, mais para nós xa foi unha celebración sermos finalistas e acudirmos ao acto. Este estivo amenizado por un regueifeiro e polas actuacións dos podcasts gañadores. Os nosos alumnos e alumnas recibiron o seu premio de finalistas, unha figura realizada pola EASD Mestre Mateo, un diploma e un lote de libros. Parabéns ao noso alumnado polo seu traballo!
Ningún comentario:
Publicar un comentario